Ministria për Punë të Jashtme e Greqisë, nëpërmjet një kumtese, ka reagur për “përdorimin e përsëritur të gabuar të emrit të IRJM-së” nga ana e komisratit evropian për zgjerim dhe fqinjësi të mirë, Johannes Hahn në intervistë për gazetën gjermane “Spiegel”.

Nga MPJ greke thonë se përdorimi i “shprehjeve të papërshtatshme” nuk ndihmon arritjen e avancimit në bisedimet për emrin, por edhe nuk është në pajtim me rolin e BE-së.

“Ftojmë komisarin Hahn të respektojë të drejtën ndërkombëtare dhe të mos i shkelë, ndër të tjera edhe detyrimet e vetë BE-së, e në veçanti gjatë një periudhe kritike siç është tani kur zhvillohen negociatat për emrin. Përdorimi i përsëritur i këtyre shprehjeve të papërshtatshme nuk ndihmon procesin e negociatave për emrin, por edhe nuk janë në pajtim me rolin konstruktiv që duhet ta ketë BE-ja”, thuhet në kumtesën e MPJ greke./Telegrafi/